জেন য়ারি দুহান

জেন য়ারি এতা নিয়াম পুরানা য়ারি। লোকগাঁথা। মুলত থাইনাকার আমলর জাপান দেশে য়ারি এতা মানুর থতাত্ত থতাৎ রচিত অসেতা। জেন মহাযানী বৌদ্ধ র্দশনর ডেঙ আগো। এপেই বিশ্বাস বারো ভক্তিত্ত ধ্যান, আত্মজ্ঞান বারো আত্মপোলব্ধিরে বপিয়া গুরুত্ব দেনা অর। ‘জেন’ (Zen)ওয়াহি এগো জাপানিগো অইলেউ সংস্কৃত ‘ধ্যান’ শব্দর চীনা রূপউহান জাপানে গিয়া ‘জেন’ অসে উনিয়া গবেষকে মাৎতারা। জেন’র লিংখাৎপা বোধিধর্ম (৪৪০-৫২৮ খ্রী:) গিরকর গরগউ দক্ষিন ভারতে। জেনর বিতরে জাপানর শিন্টোধর্মর লগে বৌদ্ধবাদ আয়া তিলসেগা মাতে পারিয়ার। প্রাচীন মণিপুরর পাখাংবা লাইসন/হমাদেনি পদ্ধতির লগে জেনর মিলআহান পেয়ার। জেন য়ারি এতা মুলত বৌদ্ধভিক্ষুর য়ারি অইলেউ এপেই লোকায়ত জ্ঞানর চর্চাউহান ইঙাল ঙালয়া ফুটের। য়ারি উতার ভঙ্গি নিয়াম সরল সিদা। কিন্তু বিতরর য়ারিহান হারপানি চিল। সাধারন য়ারিআহার বিতরে যে অসাধারন ভাবহান, লু শিক্ষা আহান লুকেয়া থার উহান চেইল মাটিকহান। ঔহানে জেন য়ারি এতা জাপান লালয়া বিশ্বর নানান দেশে জনপ্রিয় অসে। নানান ঠারে অনুদিত অসে।

জেন’র মুলগো অইলতা মৌনতা। মৌনি। কিত্তাউ নাতারিয়া ইমে খালকরানি। খালকরতে খালকরতে নিজরে চিনানি, নিজর বিতরর ‘মি’ উগরে চিনানি, বারো এসাদে ‘মি’ উগরেলো জগৎহান চিনানি। আগেই মাৎলু, জেন বস্তু এহান হারপানি চিল, হুত্তুমে মাততে গেলেগা এহান হারপানির বস্তুহান নাগৈ। আরাক আগদে মাতে পারিয়ার, জেন’রে হারপানি নিয়াম সোজা, হারনাপানি ঔহানই হারপানিহান। যেতাউ অক, প্যারাডক্স এহানর বিতরে না হমেয়া আপাতত জেন য়ারি দুহান হুনিক।

‘চা  পি’

বুড়া অজা জোশু গিরকে আকমাউ আশ্রমহানাৎ হবে আহেসে ভিক্ষু আগরে আঙকরেরতা,
‘তি আগে কিতা এপেই আহেসিলেগো?’
ভিক্ষু উগয় মাতের, ‘হায় অজা, আহেসিলু’।
লগে লগে জোশু অজাই মাতের , ‘চা পি’।

থাংনাৎ আরাক ভিক্ষু আগো আইলতা। ঔগরেউ জোশু গিরকে আঙকরলো,
‘তি আগে কিতা এপেই আহেসিলেগো?’
উগয় বারো একদুম উল্টা জওয়াপহান দিলো, ‘নাহ, মি এপেই আকমাউ পেয়া নাহেসু’।
জোশু গিরকে উগোরেউ লগে লগে মাৎলো, ‘চা পি’ !

ইনজু বুলিয়া আশ্রমহার থৌপু আগো আসিলতা। উগোই খাঙকরে নারিয়া মাতেরতা, ‘কিহানতে অজা? মানুয়ে কিতা জওয়াপ দিলা নাদলা ঔতার বারাদে সুপৌ নাচেয়া ইমে চা পিনারকা মাতরহানতে?

বুড়া অজা উগোই এমতা ইনজুরে ডাহের, ‘অ ইনজু!’
ইনজুয়ে খুমকরলো, ‘হায় অজা?’
জোসু গিরকে আহিগির পাতাহানি জিপিয়া মাতের, ‘চা পি’ !!

আলটিমেট টিচিং

জাপানে আগে বাহার টুপ আহান, পাতা বারো মোমলো থমেই হঙকরলা। আহিৎ নাদেহের কানা আগোই তার মারুপ আগোর লগে উনা অনাৎ গেসেগাতা। য়ারিপরি দিতে দিতে রাতিহান অ’পলগা। মালুপ অগই তারে থমেই আগোলো যানারকা মাৎলো।

“মোরতা থমেই না লাগবো,” কানা উগোই মাতের। “মোরতাতে রাতিয়ৌ অহান দিনৌ অহান।”

মারুপ উগোই মাতের, “উহান মি হারপাসু তোরকা থমেইর দরকার নেই। কিন্তু থমেইগো নেইলে আধারহানাৎ মানুয়ে তোরাং থেঙয়া পড়পড়লেগাতে? মাতুরি অহান হুন,থমেইগো লগে নেগা।”

কানা উগোই থমেইগ’লো সা্লইল। খানিপ্পারা যিতেগাই মানু আগই আয়া মাতের, “গিরক,পথহান চেয়া আ’ত।”

“মোর আতহানাৎ থমেইগো দরেসু অগো নাদেহরথাঙে?” কানা উগোই মাতের।

মানু অগোই জওয়াপ দিল, “থমেইগো আছে, মোমগোতে লয়পড়সেগা গিরক”!

মার্টিন নেমলারর কবিতা আহান

তানু যেবাকা কমিউনিস্ট ঔতারে দরিয়া নিলাগা
মি কিত্তাউ নামাতেসু,
কিয়া মাতলে মি’তে কমিউনিস্টগো নাগৈনায়।

তানু যেবাকা শ্রমিক ইউনিয়নের মানু ঔতারে দরিয়া নিলাগা
মি কিত্তাউ নাতারাসু,
কিয়া মাতলে মি’তে শ্রমিকগো নাগৈনায়।
থাংনাত তানু ইহুদি ঔতারে দরিয়া নেনারকা আলথক আইলা
মি ইঙ্গ অয়া আসিলু,
কিয়া মাতলে মি’তে ইহুদিগো নাগৈনায়।
এমতা তানু আইলা ক্যাথলিক ঔতারে দরিয়া নেনাৎ
মি ইমপানি অয়া থাইলু,
কিয়া মাতলে মি’তে ক্যাথলিকগো নাগৈনায়।
লয়তেগা তানু আইলা মোরে দরাৎ
কোনোগয় মোর পক্ষে মাতাত নাইলা,
আকগউ জিঙতা অয়া থাইলেনায় মাতানিহানতে!

 
বার্লিন | ১৯৩৯

অগস্ত্য

1620836_10203135279322512_1620663958_n

লেরিক এহান না পাকরেসি উতাই বিষ্ণুপ্রিয়া মণিপুরী ঠারর ডাঙর দিক আহার লগে উনাউনি নাসি। থেরেক থেরেক করের ঠার এহানলো ইমে এলা-কবিতা-য়ারি নাগৈ, চৌকষ গদ্যও যে ইকরানি অকরের উহান কুমারী দেবলা মুখার্জ্জী গিথানকে দেহুয়াদেসে। পয়লা পাকরলু সমেইত ভাষাতত্ব্ব বা বানান বিতর্ক কোনহার বারেদে সুপৌ মনহান নাগেসেগা, ইমে ভাষাহানর তীব্রতা উহান দেহিয়া ঙাকয়া আসিলু আমার ঠারে এসাদেউ গদ্য ইকরানি অকরের দেহিয়া! চহা চহা ওয়াহি, বাক্যরীতি বারো যুক্তি বারো রূপকর প্রয়োগ উতা মনহান কারুলাসিল। ঔহাত্ত অনুপ্রাণিত অয়া পৌরি পত্রিকাৎ ‘রসরাজ শর্মা’ নাঙে স্যাটায়ার কলাম কতগৌ ইকরেসিলু।

লেরিক এহানাত চারিহান প্রবন্ধ আসে। আমার ঠারহার ঠুলগো লেপকরতে, ঠার এহানর আরূপী বৈশিষ্ট্য বারো বানান পদ্ধতির গজে মুল ফাৎকরা আলোচনা অসে প্রবন্ধ এহানিৎ। গিথানকর হাবি মতর লগে একমত অনা নারেসু। মতামত ঔতাউ বিষ্ণুপ্রিয়া মণিপুরী ভাষতত্বর লমইলগা সিদ্ধান্ত বুলিয়াউ না নিঙকরৌরি। কিন্তু লেরিক এহান আমার ভাষাতত্ব চর্চার ইতিহাসে আচানক মিঙাল আহান।

হাবিয়ে খমকরিয়া পাকরানির লেইরিকহান। সরালেল প্রকাশনী, কৃষ্ণনগর দুল্লভছড়াত্ত ফঙসিল ১৯৯৩ সালে। লেরিকহার ভূমিকাহান ইকরেদেসেগো আমার দিল্স লক্ষ্মীন্দ্রদা’য়।

মুক্তবুদ্ধি

১.

সময়আহাৎ নিউজফিডর বারাউগদে চেয়া হারদিন ঠুনিংশ্বা বেললু। মারুপর তালিকা উহান সিংহ সিনহাই বুজেসি। বপতাই নুয়া প্রজন্মর শৌ। তানুর য়ারিপরি চিন্তাভাবনা মনস্তত্ব চেয়া হতাশ অইলু। হারপেইলু মুঙেদে আমারতা জড়বুদ্ধি প্রজন্মআহান আইতারা। কোনতাই রাস রাখুয়ালর ফটো আকেইগ দিয়া ডাঙর অইতারা। কোনতাই সুদেষ্ণা বিমলর ফটো শেয়ার দিয়া লাইক কামেইতারা। কামাখ্যার তিনমুখিয়া হরপউগোর ফটো দিলে ১০০ লাইক পড়ের। থাইলে থাইলে বিপ্লবি আকেইগয় বুজনরে থারেইতারা। কিয়া দলাদল কররায়, কিয়া উন্নতি নাকরলায়, কিয়া যুবকরে সুযোগ নাদরায় ইত্যাদি। নাগরি মেয়েকলো ইকরলে আকেইগয় মাততায় বাংলা পাকরে নারুরি হানতে দাদা। আকেইগয় নিজর মেয়েক হঙকরানিরকা পরামর্শ দিতায়। হিদল খানা না নাখানি ঔতালৌ চিন্তা করেকুরার অভাব নেই। বুদ্ধিবৃত্তিক শুণ্যতা উহানে চারিয়বারা হাপদেসে। পঠন পাঠনর অভাবে বুদ্ধিশূণ্যতা দেহাদের, চিন্তা-মননে দৈন্যতা আহের। ঔহানে অন্ত:সারশুণ্য য়ারিপরিলো দিনহানি কাটানি অহানরেই তানু জীবনর তাৎপর্যহান উনিয়া নিংকরতারা।

২.

বেকুবর স্বর্গ এগৎ খাংদা করে শৌ দুগো আগোর মুক্তচিন্তা মননর য়ারি অউতা দেখলে নুয়া করে হপন দেহানি আহের। নাহ্, এবাকাউ মুঙেদে দিন আসে সাৎ। যুগে যুগে সমাজ এতা পরিবর্তন অসেতা, প্রগতি আহেসেতা দ্রোহলো। বিপরীত চিন্তালো। হাবিরাং ক্ষমতা উতা নাউ থার। সক্রেটিস ব্রুনো বুদ্ধ চৈতন্য লালনসাঈ বিদ্যাসাগর রামমোহন গোকুলানন্দ তানু সমেইর দাবিলো জরম অসিলা। তানুর আত দরিয়া সমাজ এতাৎ রেনেঁসা আহেসিল। আমি জাগরনর য়ারি দিয়ার। চিন্তার জগৎ এহান রুদ্ধ করিয়া থইলে জাগরন নাহের। মস্তিস্কর কোষে কারফিউ দিয়া থইলে প্রগতি নাহের। সভ্যতার ইতিহাস বারে বারে মানুরে শিক্ষা উহান দিয়া যারগা।

৩.

জড়বুদ্ধি প্রজন্ম হঙনির পিসে ঔপনিবেশিক শিক্ষাব্যবস্থার অবদান আছে। আদিম সাম্যবাদী সমাজর ধ্বংসস্তুপেত্ত লিংখাত অসে নুয়া সমাজকাঠামো, ভূগোল বারো রাষ্ট্র। মানুরে আধুনিক শিক্ষাত্ত বঞ্চিত করিয়া খামতলে বেলিয়া থনা চেইতারা শোষকশ্রেণী বারো তানুর সেবাদাস রাষ্ট্রয়। সঠিক শিক্ষা পেইলে সচেতন অইলে অউহান তানুর অস্তিত্বরকা হুমকি আহান। এগদে হতদরিদ্র লেইরাপা মানুর ইহকালর হারৌপা অহান আমারহান নাগৈ বুলিয়া পরকালর বারাদে মনহান দিতারা। ভাববাদ পরজাগতিকতা উহান এসাদে সিতারার লয়াত্ত লয়াত। মগজ আগত্ত মগজ আগৎ। ঔহানৌ মানব মনস্তত্বহান। প্রশ্ন করানি বা উত্তর বিসারানিত্ত মীমাংসার লপুকে বয়া হপন দেহানি নুঙেই।

৪.

আমারতা হবা লেখক নেই। লেখক দুগো আগো থাইলেউ পাঠক নেই। পাঠকেত্ত লেখকে বপিলে যেহান অর উহান। লেখানির পুর্বশর্ত অইলতা পঠনপাঠন। ঔহানে উঠেই জাগেই উনিয়া লিখতারা আমার জাগরনর কবিতা উতা পাকরলে ঘুম আহের। মানু আগ দুগো জাগলেউ কবিতাহানতে না জাগের। আমারতা হাবির আগে হবা পাঠকশ্রেনী আহান লাগের। সক্রেটিস, প্লেটো , রুশো , মার্ক্স পাকরেকুরা পাঠকশ্রেনী আহান । দেকার্ত, শপেনহাউয়ার, কান্ট, হেগেল, রাসেল, মুর, ফুকো, দেরিদা, হাইডেগারর দর্শন হারপাকুরা পাঠকশ্রেনী আহান। বারার মানুর লগে তর্কারে বইলে ডাস ক্যাপিটালেত্ত পটকো লাইন আহান কোট করে পারেকুরা মেধাসম্পন্ন মানু দরকার।

৫.

দিন ঝিলিকার। বরণহান আইতয় শৈনেই। আজি নাইলে কালি। অৱাঙেদের খিলকিহান আঙকরিয়া বাসেয়া আসু খৌরাঙলো।

ঢাকা ৩০ মার্চ ২০১৪

এন্ড্রয়েড মোবাইলে বিষ্ণুপ্রিয়া মণিপুরি

নুয়া মোবাইল উহান গুতাগুতি করতে গিয়া আজি অন্ধকপা হারৌ আহান লাগিল। বাংলা এনাবল করিং উনিয়া ল্যাংগুয়েজ সেটিং এ গিয়া চউরিথাং আমার ঠারর নাঙহানৌ আসে। নর্থ-ইস্ট ইন্ডিয়ার বিতরে ইমে অসমীয়া, বাংলা বারো আমার ঠারহান মাল্টিমিডিয়া মোবাইলে হমাসে। মোর মোবাইল এহার ব্র্যান্ডহান ওয়ালটন, এন্ড্রয়েড সেটহান। কোন সফটওয়ার নাগৈ, মোবাইলহার ফার্মওয়ারে বিল্ট-ইন করেদেসি। তাপ্প তাপ্প হাবি মাল্টিমিডিয়া মোবাইলে আমার ঠারর নাঙহান পেইতাঙায় আশা থউরি।

ইন্টারনেটে লেখালেখি করিয়া কিতা কানা উনিয়া মাতেকুরা গিরিগিথানীর ভুলহান আগদিন বাগতই শৈনেই। আমার বিশ বছরর হন্না এহান বিফলে নাগেসেগা এহানই অউহার প্রমাণ। ইমারে আকদিন আমি পাহুরলেউ মেশিনেতে না পাহুরবো!

ডাঙর জাত হুরু জাত

“The goal of colonialism is not just to
kill colonized peoples, but to destroy their
sense of being people”
~ Andrea Smith, Hetero-patriarchy A Building Block of Empire

১.
ডাঙর জাত হুরু জাত উনিয়া কিত্তাউ নেই। হাবি জাতউ ডাঙর হাবি জাতউ হুরু। জাত আকেইহার হঙনির ইতিহাসর লগে ভৌগলিক পরিবেশগত কারণ থার। নৃবিজ্ঞানে ডাঙর হুরুর মুল্য নেই। বহুজাতিক বারো বহুভাষিক রাষ্ট্র উতাৎ সংখ্যায় য়াত জাতিসত্তা উতা সবসময় বৃহত্তর জাতরাং কোনঠাসা অয়া থাইতারা। আমি থায়ার রাষ্ট্রকাঠামো ঔতাত বৃহত্তর জাতর ঠার সংস্কৃতি আইডেন্টিটির মুঙে ক্ষুদ্র জাত ঔতা নিয়াম হিমপেয়া টিকিয়া থানির সংগ্রাম করতারা। ঔতার বিতরে হাবিত্ত ডাঙর সমস্যাহান থানির ভূমিহান। ভূমিউহান নেইলে মানুগৈ নাথার। মানুগো নেইলে জাতহানৌ নাথার, থারহানৌ নাথার, সংস্কৃতিহানৌ।

২.
কাদাবারাদে আমার সাদে নানান জাতর মানু থাইতারা। টেঙারাৎ থাইরাতা। সমতলেউ আসি। চাঙমা, মারমা, ম্রো, বম, পাঙখোয়া, খিয়াং, রিয়াং, সাঁওতাল, কোচ, বর্মন, ওঁরাও – তানু কতিহান হিমপেয়া আসি আমি খবর নাউ থয়ার। নাউ পেয়ার। জাত আকেইহান আসি থানির গর নেই। উদ্বাস্তুর দেহি বুলে বুলে থাইতারা। কুনোতারে বিটাবাড়িত্ত উচ্ছেদ করেদেসি। গর গাঙ জ্বালাদেসি। খেতিবাড়ি হাবি কাড়লিয়া নেসিগা। মানু ঔতারে তুপকরিয়া গাটে উদাদেসি। নিঙল উতারে বলাৎকার করেসি। রাষ্ট্রশক্তিয়েউ তানুরে মানু উনিয়া নাউ নিংকরতারা। গাটহানাৎ বাধগ দিয়া বিদ্যুৎপ্লান্ট করতারা, উজানেদে কুংগ বাহিয়া গেলাগা ঔতার খবর নেই। মান্দি খাসি কোচ থাইতারা জাগা উতা দখল করিয়া ইকোপার্ক করতারা, টুরিস্ট স্পট করতারা। শালবনেত্ত সাঁওতাল তালকরিয়া রাবার বাগান করতারা। রাষ্ট্রত চলেসে কারবার এতা। হুদ্দা এপেইত নাগই, দুনিয়া এহার নানান কোনা কোনসেলে চলের লীলা এতা।

৩.
ঔসাদে হিনলাংলার বিতরেদে আমারতা যানা নাউ লাগের হানতে আমি হারৌপা করিয়ার। মেল করিয়ার। য়ারি পরি দিয়ার। ইলিশালো ঠেকঠেকরে বাত চারুক আহান খেয়া সমাজসেবাৎ নিকুলিয়ার। তি ডাঙর মি ডাঙর বুলিয়াউ কৌলি করে পারিয়ার। অর্জুনর ঔরসেত্ত না বিষ্ণুর ঔরসেত্ত জরম অসি এতাল তর্কবিতর্ক করিয়ার। আহি হুরুকা অসি উনিয়া মানুরে আহেয়ার। মানুরতা এসাদে সময় সেই। ঔরে মোর ম্রো বেয়কউগো আজি কামে নাগেসেগা। লাঠিগো দরিয়া বাপকর লগে গরগো পাহারা দের। নিঙল উগোই কাদাহানাৎ ঠেংকিদাহান থয়া ভাত খেইরি। আমারতা আজি ডাক্তর ইঞ্জিনিয়ার ম্যাজিস্ট্রেট অফিসারর অভাব নেই। হাবি সরকারি কোটাসিস্টেমর অবদান। কোটা ঔতা থসিতা টেঙারার ঔরে পশ্চাৎপদ শোষিত নিপীড়িত সভ্যতাত্ত দুরেই অয়া আসি মানু ঔতারকা। তানুর সুবিধা ঔতা আমি নিয়ারগাতা নিজর নিরানহাত উপজাতি ব্যাকওয়ার্ড ক্লাশ সিলগো লাগেয়া। তানু দু:খে আসি, আমি বারো তানুর সুবিধা ঔতা হাইজ্যাক করিয়া মেল করিয়ার। এগদে বারো উপজাতি তলপা জাত বুললেউ আমি তিক সৌওয়ার, স্বীকার নাকরিয়ার। এহাত্ত জিঙিন ভন্ডামি প্রতারনাতে আর কিতা?

৪.
জরম অনা নুঙেই, মানু অনা হিন। বর্তমান দুনিয়াত মানু অনার প্রাথমিক শর্তহান অইলতা নিজর স্বার্থহার বারাদে খিয়াল থনা, ব্যক্তিগত বা জাতিগত যেবেদেউ অক। আজিকালি ব্যক্তিগর্ব জাতগর্ব ঔহান মানু অনার মাপকাঠিহান। মি মানুগো অনা নারেসু হানতে বারার মানুর সমস্যালো জীবনএহান বার করেসু। বারার মানুর দু:খলো হুদিগোরে হিনলাংলা দেউরি। মানুগো নাসুহানতে কোটটাই পিসেদে ফিটফাট জেন্টলম্যান উগরে নমস্কার নাদুরি, লেংটিহান পিদিয়া জুমর খেতি করের ঔগরে সাজারাং অয়া হমাদেউরি। হুনায় রূপায় ঝকঝক করিয়া গাড়ীহানাৎ বহেসে নিঙল ঔগরাংতো কানে কলঠং লাগেয়া ফিটুপ আহান পিদিয়া পানি আনাত যেইরিগা বেয়াপা উগর বারাদে চেইতে নুঙেই পাউরি। জাতগর্বী বারো উচ্চ মর্যাদার সভ্য মানু এতারে জনমহান দেহে নারেসু। মরানির আগ পেয়া দেহে নারিম। করিলতা কিত্তাউ নেই। তুমি হাবি ডাঙর মানু। ডাঙর অয়া থায়। মি তলপাগো। তলয়া থাইঙ।
মার্চ ৭, ২০১৪

ডাকাতি বারো লাকাটি

১.
গাঙগরে ডাকাতির উপদ্রব বাড়ে যারগা। গেলগা কালি ভানুগাছর নগরে ডাকাতি হমেয়া গর আগত্ত তিন ভরি হুনা বারো নগদ রূপাপয়সা যেতা পাসি হাবি নিয়া গেলাগা। মাহা দুহান আহান আগে মাধবপুরে ডাঙর ডাকাতির ঘটনা কতহান অয়া গেলগা। প্রশাসন বারো আইনশৃংখলা বাহিনীর কোন উদ্যোগ এবাকাউ নাদেখলাং। এবাকা রাতি ডাকাতি অর, ভবিষ্যতে বিয়ান বেলিটিকে অইতয়। হুদ্দা ডাকাতি নাগই। আরতাউ হবানেই ঘটনা আমারকা বাসেয়া আসে।

২.
বাংলাদেশর জাতীয় ইলেকশনে সাম্প্রদায়িক বিএনপি-জামাতে ইসলামি জোট জিঙেবেল্লে সংখ্যালঘু, বিশেষ করিয়া হুরুকাং জনগোষ্ঠি ঔতার ভাগ্য আঁধারে বুরদিতই। পার্বত্য চট্টগ্রাম, নওগা, সুসংদুর্গাপুরে যেতা আসি ঔতাতে ভিটাবাড়ি বেলিয়া দাবদানি লাগতই। আমারতাতে যানার পথহানৌ নেই। ভানুগাছ বুলতারা লয়া এহান আমার মানুয়ে রাজত্ব করিয়া থসিলাহান। আমার আপাবপার শৌর্যবীর্যর কারণে বাঙালি হিন্দু বাঙালি মসরমান হাবিয়ে আমারে ডরপেইলা। গেলগা ৫০ বছরে কুরাং কুরাংতো মসরমান এতা আয়া আমার লয়া এতাত লাম পাতিয়া আমারেই সংখ্যালঘু হঙকরেদিলা। এবাকাতে কাঙ আসুলানির সমেইত পেয়া মসজিদ আগো পেইলে ইম্পানি অয়া যানা লাগের।

৩.
আমার আপাবপায় হঙকরেসিলা সাগেই-লকেই-শিংলুপ ভিত্তিক সমাজব্যবস্থা এহাত নিয়াম সোস্যাল সিকিউরিটির ব্যবস্থা থসিলা। আমার ভিটাবাড়ীত বারার মানুয়ে বরানির চল নেয়সিল। এমনকি বারার মানুয়ে খানার খুপাং খেরি ঔতা পেয়া বারে থইলা। এতা হাবি করেসিলাতা সামাজিক নিরাপত্তারকা। এবাকা আধুনিক শিক্ষা বারো চিন্তাধারা হমানির পরে আপাবপার রীতিনীতি আমি নাউ মানিয়ার। করিম রহিম পরিতোষ ফারুক হাবিরে গরে বরিয়ার। ফলাফলহানতে ইমে মুঙহাত দেহরাং। কার গরে কুন জাগাত কিতা আসে ঔতা হাবি এবাকা বারার মানুর নখদর্পনে। কালি ডাকাতি অসে গর উগত ব্যাংকেত্ত রূপা তুলিয়া আনেসি বারো আনিয়া কুরাং থসি জাগা অহানৌ ডাকাতিয়ে হারপাসি। হানতে বিষয় এহানলো খারকরানি থক।

৪.
আমিতে যোদ্ধা জাতিহান। থাইনাকার কালেত্ত মনিপুরর মাটিত কৌমগোষ্ঠি উতা নানান যুদ্ধ-সংগ্রামর বিতরে টিকিয়া আসিতা। থাংটা, কাংজেই, লাকাটি, লাঠিকেল খেলা উহানতে আমার একদম মিহুলগর লগে তিলয়া আসেতা। মাইর কিতা অইলে বারার মানুয়ে মনিপুরি লাঠিয়াল হায়ার করলা। আমার বপায় গরে কার-ধনুক থসিল। এবাকা উতা চিন্তাই করানি নাকরের। হাবি পাহুরে বেল্লাং। এবাকা আমার সমাজে গিরীন্দ্রর সাদে কোন বীর না নিকুলতারা। এসাদে আমার নিরাপত্তা ব্যবস্থা বাগিয়া পড়িল বারো বারার মানুয়ৌ আমারে থৌ না-সাকরানি অকরলা। আমার দেবোত্তর সম্পত্তি শ্বশানঘাট হাবি বেদখল অয়া আহের। আকদিন আমার ভিটাবাড়ির বারাদেউ মিল্লেং দিতায় শৈনেই। আমার নিঙল ঔতা আসিতা হাবিত্ত বিপদে। কত নিঙল মিয়াঙর আতে হেনস্তা অইতারা হিসাব নেই, সমাজর লাসডরে না ফুকেইতারা।

৫.
কিহান সমাধানহান অউহার জওয়াপতে মোরাং নেই। ক্ষুদ্র বুদ্ধি এহানলো হারপাউরি গাঙে-গাঙে গরে-গরে নিরাপত্তা বলয় হঙকরানি নারলে উপায় নেই। আমার শৌ সুমারা গাওরাপা পুরিজেলেই হাবিয়ে আত্মরক্ষার ট্রেনিং দেনা। গাঙে গাঙে যুবকলো একশন-টিম হঙকরানি। আমারতা যেতা প্রশাসন বারো রাষ্ট্রর ডাঙর পদফামে আসি ঔতারে কামে লাগানি। সার্ভাইভ করে পারানি উহান হাবির আগে। জিংতা অয়া থানা পারলে হারা জীবনহান সমাজসেবা, উন্নয়ন, উন্নতি, হজাক অনা, দলাদল, মহামেল হাবিতা করে পারতাঙাই।

ঢাকা   ০২.০৮.২০১৩

কালা ধলা: সৌন্দর্যর ভ্রান্ত মনস্তত্ব

১.
কৃষ্ণ কালা অইলেউ তা ধলা নিঙল বিসারার। হাবিয়ে ধলা নিঙল বিসারতারা। ধলা অনি মনেইতারা। কালা নিঙলশৌ উগো বেলা আহান ভাত নাখেয়া অইলেউ বাজারেত্ত ফেয়ার এন্ড লাভলি লয়া, উতা গষিয়া মেইথঙহান ধলা করানি মনেইরি। ধলা অনা উহানেই চুনা অনিহান- এরে ভ্রান্ত মনস্তত্ব এহান বরাদেসিতা আর্যই। আর্যর দেবদেবী প্রায় হাবি গৌরবর্ণ। কালা অইলাতা অসুর। ভারতবর্ষর মুল জনগোষ্ঠি দ্রাবিড় তানুরে অসুর মাতলা। হানতে কালা হবানেই, ধলা হবা। থাইনাকার কালেত্ত মুরগৎ বরাদেসি লাল ধারনা এহান সিতারার বুজনরাংতো শৌরাং।

২.
নিঙলশৌ আ’গ কালা অইলে উগলো মালক বাপক চিন্তাত পড়তারা। কিসাদে বিয়া দিতৌ মোর জিলকরে। তানুরে পাঙলাক করানিরকা পশ্চিমা কর্পোরেট গোষ্ঠি দাতসরি মেলিয়া মুঙে আইলা। সমাধান বাগেইতারা। রং ধলা করানির ক্রীম। হাপ্তা আহান গষলেই মেইথঙহান ঝকঝক উনি। হায়তায় নাগৈতায় আশ্বাস দিয়া মানুর দুর্বলতা উহানতে পুজি করিয়া ব্যবসা করানি এহান কর্পোরেট ধর্মহান। ব্যবসা এহান লেইরাপা দেশ উতাত হাবিত্ত নুঙেই। তুমি মাল লইতে থায়, আমি এগতে পয়সা গনিক। তানুর লগে আসি মিডিয়া, পত্রিকা, টিভি, রেডিও। নাগই য়ারি দিয়া প্রোডাক্ট এহার পাবলিসিটি করুয়ানি। উপেই দেহুয়েইতারা ক্রীম গষিয়া বিল গেটসর সাদে দামান পেইতারা, ক্রীম গষিয়া চাকরি পেইতারা, ক্রীম গষিয়া পরীক্ষাৎ পাশ করতারা। মানুরে বেকুব হঙকরতে মিডিয়ার জুড়ি নেই।

৩.
মানুর কালা ধলা অনি উহান জন্মগতহান। ভৌগলিক বারো নৃতাত্ত্বিক কারণে ভারতীয় উপমহাদেশর শতকরা পচানব্বই ভাগ মানুর গারিগর স্বাভাবিক রঙহান কালা। ইমে দুগো আগো ধলা অইতারা। চামড়াহার পয়লার এপিডার্মিস স্তরে মেলানিন বপিলেউ রংহান কালা অর। ক্রীম গষিয়া মেলানিন কমানি সম্ভব নেই। সাময়িকভাবে হাইড্রোকুইনোন, স্টেরয়েড, মার্কারি, নায়াসিনামাইড এসাদে ক্যামিকেল কতহান মেলানিন কমানি পারের কিন্তু অউতা চামহানরকা নিয়ামপারা ক্ষতিকর। মেলানিন উৎপাদন এহান দেহাগর স্বাভাবিক প্রক্রিয়াহান; না মরেসে মাহি উৎপাদন অইতে থার। কারণহান মেলানিনে আমার চামহান সুরক্ষা করিয়া থর। রং ফর্সার ক্রীম ঔতায় কৃত্রিম পিগমেন্টেশন আহান দেহুয়েয়া চামহানর দীর্ঘস্থায়ী ক্ষতি করের এহান বৈজ্ঞানিকভাবে প্রমাণিত অসে।

৪.
নারীচরিত্র এহানরে সাম্রাজ্যবাদর ইউরোপীয় সংজ্ঞালো চানা এহান দাস মনোবৃত্তি হান। আমি তানুর চাকর অনা মনেয়ার। তানু যেসাদে অসি অউসাদে অনা মনেয়ার। নাইলে টিভি সিনেমা পত্রিকা য়ারিৎ যে ভ্রান্ত মিথ আহার হঙসে উহান কিয়া বাগানি নারিয়ারতা? ধলার জয়গান মানে কালা উগরে তলকরানিহান। মৌলিক মানবাধিকরর লংঘন। বর্ণবাদরকা যদি শাস্তি থার, উতা অইলে রং কালা-ধলা বিসারিয়া ব্যবসা করতারা উতারতা কিয়া শাস্তি নাইতয়তা? মোর দাঙ্গ কালা, মোর মালক কালা, দ্রৌপদি কালা, শমিষ্ঠা কালা, ভ্রমর কালা, কৃষ্ণ কালা – কালা উহানেই আমার চিরন্তন চুনাহান।

Dark is Beautiful! Stay Beautiful!!

ঢাকা   ১৯.০১.২০১৪

‘ছ’বর্ণ, ‘স’বর্ণ বারো তালসপার য়ারি

আমার ঠারে বানানলো বিতর্ক এহান নংসাং দিনরহান। বানানলো কৌলি এতা বাংলা অসমীয়া হাবি ঠারেউ আসে। বাংলা বানানলো নানান মতভেদ আসে, ঔতালো বিতর্ক এবাকাউ চলের। বিষ্ণুপ্রিয়া মণিপুরী ভাষাত ক্রিয়ারমা বারো শব্দরমা বানান সম্পর্কে দুহান মতভেদ দেহিয়ার। মতভেদ দ্বিয়হানিলো গ্রুপ দুহান খেয়সি। দাপা আহান অইলাতা ‘দন্ত্য-স পন্থী’ আরাক দাপা আহান ‘ছ পন্থী’।

‘স’ পন্থী
‘স’ পন্থী গিরিগিথানীয়ে ক্রিয়াপদ বারো ক্রিয়া বিভক্তিৎ দন্ত্য-‘স’ গো বেবার করানির পক্ষে। যেমন অসে, অসিল, আসু, খাসু এসাদে। বারা এগদে আসিতা স্বর্গীয় শ্রীজগৎমোহন সিংহ, অধ্যাপক শ্রীবীরেন্দ্র সিংহ, অধ্যাপক শ্রীবরুনকুমার সিংহরেলো চিংকরিয়া নিখিল বিষ্ণুপ্রিয়া মণিপুরী সাহিত্য পরিষদ। তানুর যুক্তিহানি অইলতা – আমার ঠারে সংস্কৃতর ‘অস্’, ‘আস্’ বারো ‘ভূ’ ধাতু তিনহানির প্রভাব এতা অপরিহার্য। ‘শ’ ‘ষ’ ‘স’ ধ্বনি এতা শৌরসেনী প্রাকৃতর সাদে আমার ঠারেউ ‘হ ধ্বনিত পরিণত অর ঔহানে আমার ঠার এহান শৌরসেনী প্রাকৃতত্ত হঙসেহান। শৌরসেনী নাঙ এহান আহেসেতা মহাভারতে বর্ণিত মথুরার কাদার শূরসেন দেশর নাঙেত্ত। হানতে শৌরসেনী প্রাকৃতত্ত অপভ্রংশ অয়া জরম অসে পশ্চিমাহিন্দি বারো হিন্দুস্তানি ইত্যাদি ঠার এতা অইলতা বিষ্ণুপ্রিয়া মণিপুরীর ভগিনী-ভাষা।

‘ছ’ পন্থী
‘ছ’ পন্থী গিরিগিথানীয়ে ক্রিয়াপদ বারো ক্রিয়া বিভক্তিৎ ‘ছ’ গো বেবার করানির পক্ষে। যেমন অছে, অছিল, আছু, খাছু এসাদে। স্বর্গীয় শ্রীকালীপ্রসাদ সিংহ পিএইচডি ডি লিট্ গিরকরে চিংকরিয়া বিষ্ণুপ্রিয়া মণিপুরী সাহিত্য সভার গিরিগিথানী বারা এগতে আসি। তানুর যুক্তি মুলত দুহান – ‘আছ্’ ধাতু বারো ছে, ছু, ছি ইত্যাদি ক্রিয়বিভক্তি এতা আহেসেতা প্রাকৃত ‘অচ্ছ’ ধাতুত্ত। সংস্কৃতর ‘ছ’ ধ্বনি এগো বিষ্ণুপ্রিয়াত ‘স’ হিসাবে উচ্চারন অর; হানতে যেপেই ‘স’ ধ্বনি থার ঔপেই ‘ছ’গো ইকরানি। আরাক আহান অইলতা- মাগধীত্ত অপভ্রংশত্ত অয়া সৃস্টি অসে অসমীয়া, বাংলা, উড়িয়া, চাকমা ঠার এতা বিষ্ণুপ্রিয়া মণিপুরীর তুলো আশি/নব্বই ভাগ মিল। মাগধী অইলতা প্রাচীন ভারতর মগধ অঞ্চলর ঠারহান। হানতে বিষ্ণুপ্রিয়া মণিপুরী ঠার এহানউ মাগধী প্রাকৃত ঠারেত্ত সৃস্টি অসেহান।

নিয়ামদিন ধরিয়া নানান রথী-মহারথীর বিতরে তর্ক -বিতর্ক অয়া গেলেগাউ মীমাংসার লেপ্পা ফাম আহানাত গিয়া উবা অনা নারেসি। তালসপা আহানলো বেইবুলি আহানে বিচার কিতা বয়া লয়তেগা দ্বিয়পক্ষউ ‘বিচার মানি কিন্তু তালগাছ আমার’ উনিয়া দাবি করলাহানতে আর মীমাংসা নাইল। আমার বানানর কৌলি অহানউ এসাদে অসে। যুক্তিতর্ক বিচার আলোচনা হাবিতা করিয়া লইতেগা হাবিয়ে যারযির সিদ্ধান্তৎ অটল থানিয়ে বানানলো কৌলি এহান লমনির দিশা নাপার। তবে আমি আশা থয়ার আলোচনার মাধ্যমে আকদিন বানান সমস্যা এহার সমাধান অইতয়।

ভাষাতাত্ত্বিক পরিচয় নৃতাত্তিক পরিচয়

১.
“মণিপুরি” বারো “বিষ্ণুপ্রিয়া মণিপুরি” ওয়াহি দ্বিয়হানিলো খালকরিন য়ারি আছে। সাধারন অর্থে মণিপুরি এহান জনিক পরিচয় আহান বুঝার, নির্দিষ্ট কোন ভাষাগোষ্ঠি আহানরে না বুঝার। অভিধান ইলয়া মাতলে মণিপুরি মানে মণিপুরর মানু বা মণিপুরে জাত বা সৃষ্ট বস্তু আহানরে মণিপুরি মাতে পারিয়ার। অন্যবেদে মৈতৈ, বিষ্ণুপ্রিয়া মণিপুরি এতা ভাষিক পরিচয়। যে জনোগাষ্ঠির মানু মৈতৈলোন বা মৈতৈ ঠার টটরতারা তানুর মৈতে বুলিয়ার। বারো যেতাই বিষ্ণুপ্রিয়া মণিপুরি বা ইমারঠার টটরতারা তানু বিষ্ণুপ্রিয়া মণিপুরি। স্যার গ্রীয়ার্সন গিরকে লিংগুইস্টিক সার্ভি অব ইন্ডিয়াত আমারে ভাষাগোষ্ঠি আহান বুলিয়া মাতেসে। বিসি এলেন, ই টি ডালটন, কর্ণেল মেককুলাক, ক্যাপ্টেন ডব্লিউ ডান প্রমুখ গিরকগাসিয়ে ‘ময়াং’ (Mayang) বুলিয়া মাতেসি অহানৌ ঠার আহার নাংহান। হানতে বিষ্ণুপ্রিয়া মণিপুরি এহান ভাষাতাত্ত্বিক পরিচয়হান, নৃতাত্ত্বিক বা এথনিক পরিচয়হান নাগই।

২.
মণিপুরর যে যে কৌমগোষ্ঠির মানু আমার ঠারহার বিবর্তন প্রক্রিয়াত ইনভল্ভড অসিলা, ঠারহান গ্রহন করেসিলা বারো ধরিয়া থসিলা তানুই আমার পুর্বপুরুষ। যেতাই অন্য ঠার গ্রহন করেসি তানু অন্য ঠারর মানু, আমারতা নাগই। তানু জনজাতি হিসাবে মনিপুরি অইতে পারে, কিন্তু বিষ্ণুপ্রিয়া মণিপুরি নাগই। এরে সূত্র এগোলো আগুয়েইলে মণিপুরর বিষ্ণুপুর, নিংথৌখঙ বা জিরিবামে যেতাই আমার ঠার বেলিয়া মৈতৈ গ্রহন করেসি তানুরেউ এবাকা বিষ্ণুপ্রিয়া মাতানি নারিয়ার। সাধারন ভাষা-পরিসংখ্যান সূত্রলো তানুরে ইমে মণিপুরি, নাইলে মৈতে বুলে পারিয়ার, কোনভাবেই বিষ্ণুপ্রিয়া নাগই। ভাষাতাত্ত্বিক আইডেন্টিটি বারো জনিক আইডেন্টিটি দ্বিয়হানি একদুম তঙাল বিষয়।

৩.
হানতে সোজা হিসাবে যেতাই বিষ্ণুপ্রিয়া মণিপুরি ঠার দিতারা তানুই বিষ্ণুপ্রিয়া মণিপুরি বা আমার মানু। যেতাই আমার ঠার নাদতারা, বা পুরাপুরি পাহুরেসি অথবা অন্য ঠার গ্রহন করেসি উতারে আমি ‘আমার মানু’ বুলে নারিয়ার। মানু আগই যে ঠারহান দের ঔহানই তার পরিচয়হান। ভারত বাংলাদেশেত্ত চিংকরিয়া পৃথিবীর হাবি দেশেই জাতউতা এসাদে ভাষার ভিত্তিলো খেইকরতারা। হানতে বার্মা, মণিপুর বা বিশ্বর কোন কোনচেলেদে ‘আমার মানু’ বিসারানির আগে বিষয় এহানি পরিস্কার করেবেলানি থক। মতামত থদেনারকা হাবিরাং হেইচা কাৎকরিয়ার।

ঢাকা   | ২০.০১.২০১৩